Susteniment da projects regiunals

Nossa regiun porscha in reh scazi cultural e numerusas pusseivladads da s’engaschar sportivamein. Quei tut vegn tgirau da numerusas uniuns e lur commembras e commembers che s’engaschan cun tgierp ed olma per mantener quellas purschidas. Projects interessants e captivonts enriheschan nossa purschida attractiva e portan ina plivalur alla regiun. Sco banca Raiffeisen cun fermas ragischs ella regiun, vesein nus l’obligaziun da sustener quei engaschi finanzialmein.

Per igl onn da giubileum sustenin nus 3 projects cun ina summa da mintgamai CHF 25’000:

Sut igl Ischi 2024
Igl onn 1424 ei vegniu fundau a Trun la Ligia Grischa. Il giubileum centenar da 600 onns dapi l’engirament sut igl ischi vegn festivaus cun divers concerts, ina fiasta da cant, in teater el liber ed ulteriuras interessantas occurenzas.

Dapli informaziuns anfleis sin la pagina d’internet https://www.ischi2024.ch/

Forum Cultural Tujetsch
Dapi decennis s’engascha il Forum Cultural Tujetsch per promover, mantener e documentar la vasta cultura dalla vischnaunca. Per dar in suttetg central allas numerusas memorias vegn construiu il 2024 il niev archiv cultural Tujetsch.

Dapli informaziuns anfleis sin la pagina d’internet https://www.forumcultural.ch/

la pendenta
La pli liunga punt pendenta dil Grischun sesanfla beingleiti a Mustér. Cun rodund 270 m lunghezia surmunta ella la vallada dil Rein Anteriur en 100 m altezia e colligia igl uclaun Mumpé Medel cun il vitg.

Dapli informaziuns anfleis sin la pagina d’internet https://www.pendenta.ch/