La fiasta gronda da giubileum

Sonda, ils 28 d’october 2023 ha giu liug la fiasta gronda da giubileum dalla Banca Raiffeisen Cadi el Center Fontauna a Mustér. Envidai eran tuttas commembras e commembers, els ein numnadamein la petga dalla Banca Raiffeisen Cadi dapi 100 onns.

All’entschatta han ils rodund 600 hosps astgau guder in apero riche pulpiu cun diversas spisas creativas. Duront il program variont dalla sera ei vegniu presentau la cronica dalla Banca Raiffeisen Cadi ord differentas opticas. Sin la tribuna eran igl acrobat da vusch e poet Martin O., il cronist Alexi Monn sco era l’entira direcziun e cussegl d’administraziun dalla Banca Raiffeisen Cadi.

In punct culminont dalla sera ei stau il sketch divertent dils dus commembers dalla direcziun Natalia Manetsch (menadra partiziun survetschs) e Donat Albin (menader cussegliaziun da facultad). Els han buc mo strapazau bravamein la musculatura da rir dil publicum, mobein han era presentau entginas caussas historicas sco p.ex. in carnet da spargn, ina cassa da spargnar veglia ni in album da fotografias dil viadi dil persunal a Milaun. Vinavon han ils hosps astgau guder ina registraziun dalla «Boyband incl. girl nr. 1 dalla Surselva» Furbaz, nua ch’il directur dalla banca, Alfons Quinter, ha cantau en giuvens onns e priu part duas ga alla qualificaziun per igl Eurovision Song Contest.

En biala ed emperneivla atmosfera han tuts silsuenter aunc giu avunda temps per far in viva ensemen sin 100 onns Banca Raiffeisen Cadi e dar ina paterlada. Cordial engraziament che Vus essas stai dalla partida. Cun Vossa preschientscha haveis Vus procurau per ina sera nunemblideivla.